O Pili le tagata na maua ai e Upolu se faiga malo fou ma sa iloga tele lona mamalu ona o itu nei:
(1) Ua manatu tagata o ia o se saualii
(2) Ua ta lona gafa ia Tuimanua ma Tuiaana, o lona afafine o Sinaletava’e na la faaipoipo
(3) Ua iloga lona malosi ma le poto tele.
O ona atalii o Tua ma Ana, o le masaga. O le mea lea na ala ai ona faaigoa lona atalii lona tolu o Tuamasaga. O lona atalii lona fa sa faaigoaina ia Tolufale ona e faatatau i le feaveai o Sina (tina) i lea fale ma lea fale a’o le’i fanau.
O tama nei na tofia e pulea Upolu, Manono ma le vaega tele o Savaii mulimuli ane ona o le mamalu lava o lo latou tama o Pili. Na vaai Pili ua oo i aso e tatau ai ona fai lelei le malo, ona ia valaauina lea o ona atalii e potopoto mai o le a fai lana tofiga.
O le mavaega la lenei a Pili:
O Tua, o le a fai ma pule i Atua – le vaega i Sasae o Upolu. O le faailoga o lona tofi, ua avatu i ai e le toeaina lona oso, e tusa ma lona faamoemoe i le galuega e faasga i ai.
O Ana, ua tofia e pule i Aana, le vaega i Sisifo o Upolu. O le faailoga o lona tofi, ua avatu i ai e le toeaina le tao ma le uatogi, ia avea Aana ma lona itumalo e fai ma tagata tau, e fai fo’i ma faailoga o le toa.
O Tuamasaga e nofo i totonu o Upolu i le va o Tua ma Ana. Ua tuu i ai e le toeaina le tootoo ma le fue, o le faailoga o le failauga.
O Tolufale, e le’i iloga mai sona tofi mo se galuega fou. A ua tuu i ai e le toeaina le tausiga o Manono ma silasila ma matamata mai i Upolu.
O Tolufale lea na usu ia Sinalaufelo le tama teine a Utu ma Agi i Manono, ona maua ai lea o ona atalii e toalua o Luatutu ma Luafataalii. Sa nofo Luatutu i Salua, a’o Luafata sa nofo i Faleu. Na usu Luatutu ia Sinaotaeopai i Manono, e to’atolu le la fanau. O Puna, Manava ma le teine o Ulalemamae. O Puna o le tupuaga lea o Faleapuna, a’o Manava o ia lea na iloga ai ona mamalu Manono. E lua isi usuga a Luatutu, o le tasi i le tamaita’i Salailua, o lana tama e igoa ia Leiataualesa, na avea ma alii sili o Manono, a’o le isi usuga na tau i le tamaita’i Sapapalii.
O usuga na e lua, ma isi feusuaiga ma teine Savaii, ua iloa ai lava le mamalu o Manono i isi itu o le motu tele.
*faamalo atu lava i le au faitau. toe tuli tatao mai le tala lea e soso’o mai i le “taua a le au uso”
Manuia lau faasausauga Samoa