Tagaloa – Village One Samoana

O le tala faaanamua a Samoa e faapea, o Samoa lava ona pau lea o le lalolagi. Fai mai o le foafoaga na amata i le leai, ona sosoo ai lea ma le faasologa o nanamu efuefu, iloa, eleele, papatu, maataanoa ona maua ai lea o mauga. E i ai le gafa e faapea na feusua’i mea o le lalolagi ma le vanimonimo na amata i le fefaaipoipoai o papa ona maua ai lea o le eleele ona sosoo ai lea ma feusuaiga i le vanimonimo. O le faaipoipoga a lagi aunoa ma lagi fofola na fanau mai ai Tagaloa, o ia lea na faia tagata. Na tupuga mai Savea ia Leatiogie ma Tauaiupolu. O ia le uluai Malietoa, ona sosoo ai lea ma tupulaga e 20 o le auga Malietoa, seia tau mai ia Malietoa Tanumafili, na faauu e fai ma tupu i le 1899. Na toe fai e Tagaloa le lagi, ona fai ai lea ma le lalolagi. Na fai Savaii ma Upolu i maa e lua na faataavavale mai i le lagi, ae fai mai foi le isi tala, na sisi a’e nei motu mai le moana i le matau fagota. Ona faia lea e Tagaloa o le fe’e, ma fai i ai e alu i lalo ifo o le lalolagi, o le mea lea ua ta’u ai lalo o le sami po o le laueleele o Salefee. O le fe’e lena na ia aumaia i luga ituaiga eseese o papa, ona maua ai lea o lenei papa tele ua tatou mau ai. O lo o i ai faamatalaga eseese e fa pe sili atu foi i uiga i le mafuaaga o le igoa “Samoa”. E lua tala nei mai ia Turner: E toalua le fanau a Tagaloa, o le tama e igoa ia Moa ma le teine o Lu. na faaipoipo Lu ma le uso o Tagaloa, ona maua ai lea o le tama ua faaigoa ia Lu. O le tasi po a o taotooto Tagaloa o le a moe, na ia faalogo atu o pesepese le tama a lona fuafafine faapea: “Moa Lu, Moa Lu”, ona toe sui lea faapea: “Lu Moa, Lu Moa”. Ua mafaufau Tagaloa, ua fia tuu muamua e Lu o ia ia sili i luga o Moa le ulumatua, ona sasa ai lea e Tagaloa le tama i le au o lona fue. Ona sola ifo ai lea o Lu i le lalolagi, ua na faaigoa ai le lalolagi o Samoa. O le tasi tala e faapea: O Papa na usu ia Eleele ona to ai lea o Eleele. Na vaavaai atu Salevao le atua o Papa o gaoioi a’e le “moa” o Eleele, ona fanau mai lea o le tamaitiiti ua faaigoa o Moa e faatatau i le mea na vaaia o gaoioi. Na faatonu e Salevao le uso (pute) o le tamaitiiti ia tuu i luga o le uatogi ae tipi i se maa, ma ua faia pea lava lena tu pe a fanau se tama tane (ina ia toa o ia i taua). Afai o se teine, ia faaaoga le i’e mo lea mea. O le i’e o le samala laau lea e sasa ai u’a ma siapo. Ona avane lea e Salevao o le vai e fufulu ai le tamaitiiti. O lena vai ua ia faasa ai po o le “faapa’ia” ia Moa. Na tagi Papa ma Eleele ia Salevao ona o le fia maua o sina vai ina ua la lagona le fia inu. Ona fai mai lea o Salevao, afai la te maua ane ni ofe, o le a faatafe mai ai vai i pu o ofe (pei ni paipa). O le faatoa maua lena o vaipuna. Mulimuli ane ua faasa e Salevao mea uma e tutupu i le eleele, ia “sa ia Moa” po o le “paia ia Moa”, seia oo ina ua sele lona lauulu. Ua mavae nisi aso, ona sele ai lea o le lauulu o le tama, ma ua taga ai le “sa”, a o Papa ma Eleele na “sa ia Moa”, ua faapuupuu ma maua ai lo igoa “Samoa”. O le tala faaanamua i le mafuaaga o Manu’a e faapea, o Manu’a na muai faia e Tagaloa Faatupunuu. Na ia avea Manu’a e fai mona afioaga i le lalolagi. Na uma ona faia Manu’a e Tagaloa, ona ia faia lea o Savaii, ua i ai lona nofoaga i Samata. Ona sosoo ai lea ma lona faia o Fiti ma Toga, ae mulimuli ona fai o Upolu ma Tutuila. O motu ia e lua na fai i maa laiti ma iliili e fai ma tulaga o Tagaloa pe a alu i Savaii. E faapenei le tala faaanamua a Manu’a, fai mai o Manua lava le amataga o mea uma, ma o Tuimanu’a o le suli moni o Tagaloa. O le isi tala e ta’u ai Moa o le atalii ulumatua o Tagaloa, ma ua avea ai Moa ma igoa faale aiga o Tuimanu’a. O le tasi o Tuimanu’a anamua o Fitiaumua, o ia lea na iloga lona mamalu, e le gata ina sa pule o ia i Samoa atoa, ae sa oo atu foi i Toga, Fiti, RArotoga ma Tahiti. O na nuu uma sa auina mai pea ia te ia a latou taulaga (umiti) i tausaga taitasi, o i’a ma isi mea taumafa. Na uma lena pule po o le tausaga e 900 ina ua faamaopoopo le malo i Upolu e Pili ma ona atalii e toa’fa, o Tua, Ana, Tuamasaga ma Tolufale. Mulimuli ane i nisi tausaga, ua tu le malo i Savaii ona o Alali, o le isi foi lea suli o Pili. O le fanau a le atalii o Alali e i ai Fune, ma Lafai. E oo mai i aso nei e faaaoga pea e failauga le igoa “Sa Lafai” e fai ma faalupega o Savaii atoa. Ao Fune na pogai mai ai fale Safune e fa (Falefa o Safune): O Safune i Taoa, Safune Vaiafai (Iva), Safune Vaisala (tuaoi ma Asau) ma Safune Sili (e lata i Tufu Gautavai). O fale Safune na e fa e i ai le pule atoa i le filifiliga ma le alagaina o le ao o le Tagaloa. O Lafai le uso o Fune, na avea ma tupuga o Salemuliaga, ma le Tonumaipe’a. O Tagaloa, Tonumaipe’a ma Lilomaiava (e filifili ma alaga e Palauli ma Safotu), o ao pito maualuluga ia o Savaii. E oo mai i le tausaga e 1830 sa taua le itu i Matu o Savaii o le “Itu Taoa”, a o le itu i Saute o le “Itu Aea”. Ao lenei ua tau o le ITUOTANE ma le ITUOFAFINE.