Talaifeii – Village One Samoana

Ua uma ona outou silafia o Asoaitu na ia mua’i faatoilaloina Samoa. Na mavae atu ia, ae solo lelei pea le faiga a ona sui ia Samoa. O le avea o Talaaifeii ma tupu o le malo o Toga, na liliu ai le tulaga o mea, ma ua vevesi ona o le saua o lenei tupu, e faapea foi le taofi sa ai tagata o ia. E tele aso sa mau ai lena tupu i Safotu. O le ala lea o le mafatia tele o lena itu, aemaise lava Safotu sa palasi tele i ai lona saua ma le aasa o lona loto leaga. Fai mai tala tuu faaanamua a Samoa, sa faapologaina e Talaaifeii pagota e toatele e eli le lua (pu) tele lava e tusa ma le tolusefulu iata le loloto. O le lua lena sa ta’ua o le “Pu i Vaimoa“, sa lafo i ai tagata o ona aso. E tofu a le taeao ma le tagata pologa e auai mai “e fai ma aso o le tupu” Ona o le faamamaluina atili o lana pule ma lona malo i Samoa, sa ia atiinaa’e ai olo i itu uma o Samoa, ae tele lava i Safotu ma Lalovi i Mulifanua. E lata i Lalovi le faga o Nuusugale sa tatau ai le fua a Toga ina o i Upolu. Na tupu tele pea ma faamaonia atili le faamaualuga ma le saua o Talaaifeii. Na ia faapologa Samoa i galuega mamafa. O lo o vaaia nei pea faailoga e tele o ala ma olo sa tigaina ai Samoa e fai. E le tioa la ona tupu tele ma malosi atili lo latou inoino ia Toga ma le fia maua o lo latou sa’olotoga ua leva ona naunau i ai. O aso puapuaga faapena, ua fia maua ai se ta’ita’i, ao lo o i ai pea la i Faleata le alii matua o Atiogie. Ua soifua a’e ona atalii o ni taulele’a talavou loto tetele ma le totoa e pei foi o lo latou tama ina o taule’ale’a. O Tuna ma Fata ua amata ona lauiloa lo la tomai i Upolu ma Savaii. Ua avea nei foi i la’ua ma faalavelavae i le mafaufau o Talaaifeii, ua fefe i ai. Ma ua tonu ai ia te ia e fai se mea e vave faauma ai i la’ua. O le tasi aso na alu atu ai Tuna i Savaii e faataga asiasi i ni ona aiga o i ai. Ae o le aano moni o lana malaga, o le faaagaaga o se mea e lavea ai Toga. Na masalosalo le Tupu ma ua ia poloaiina ai Tuna ia alu ese vave ma le nuu, a e faale usiusita’i i ai Tuna i le poloaiga. Ona poloaiina loa lea e le Tupu ia alu ane e aveese le maa tele faatoa mafuli mai luga o le mauga ua pupuni ai le auala. Ia mae’a le galuega i le aso e tasi, afai e le uma ona lafo loa lea o Tuna i le “Pu i Vaimoa”. Na iloa lelei lava e le tupu e le mafai le maa ona fuli e se tagata e toatasi aua ua uma ona taumafai e tane malolosi e toaluasefulu ona fuliese le maa ma le auala ae e le mafai. Ina ua manino ia Tuna le mea ua manaomia ia faia e ia, ona faapea lea o si ana upu: “ua lelei, o le a ou taumafai i ai.” Ona amia lea e Tuna o Ulumasui le tama a lona tuafafine o Atiatigie. Na taunuu atu Ulumasui i Safotu, ona faasino ane lea ia te ia le maa tele ua poloaiina ai o ia (Tuna) e fuli i le sami. A le mafai ona fasioti lea o ia e ai ma le saualii leaga o Talaaifeii. Ona fai ane lea o Ulumasui, tuu mai mo a’u tau o itula e tolu ou te faia ai ae malolo oe, tasi le mea ia e alu ese ae tuu tau o a’u toatasi e manuia ai le galuega faapenei. Ona alu ese lea o Tuna, ae ua faasaga loa Ulumasui e fai lana tatalo: “Sa Tuna e, Sa Pusi e ma le Sa Fee, o mai ia se’i fuli le maa ua tele.” E amata atu lana tatalo, a ua tau le lagona ana upu ona o le selau ma selau o tuna mai le vai ma pusi ma fee mai le sami ua o mai e tusa ma lana poloaiga. e le’i atoa le tolu itula ae mae’a le galuega ua toe avanoa le ala i le malae o Malau. E le’i iloa e Talaaifeii le vavega a Ulumasui na fuli ai le maa, e oo foi i Samoa latou te le’i manino i le togafiti a le taule’ale’a. O le mea lea ua te’i ai ma ofo tele ina ua taatia i le sami le maa tele. A o Samoa ua na o le alalaga ma vivii ia Tuna ona o lenei mea uiga ese ua ia faia. A ua avea lena mea ma ala e aasa tele ai atili le ita ma le matau’a o le tupu, ma ua popole nei foua o ia e le atunuu, ae ua faigata foi ia te ia ona fasioti Tuna. O le ala lea ua le filemu ai lona mafaufau i se ala e vave ai ona faauma Tuna ma Fata. Na lagona e le auuso lena mea, ona la o ai lea i Aleipata. Ua tutuu a la savali ia Samoa uma ia loto tasi e faasaga e tuliese Toga ma le atunuu. Ua fetagofa’i le taua ma lenei upu: “Ola po o le oti.” Ua loto gatasi uma Samoa o le a fai, ma ua sauni loa le faatatauga a le auuso. Toe lua masina ona oo lea i le aso fanau o le tupu. O le a fai ai le taumafataga fiafia i le malae tele i Aleipata, ua valaauina uma Toga ia maliu atu i ai. Ua oo i le aso faamoemoeina. Ua i ai uma le Tupu ma lana autaupulega. Ua fai le fiafia, ua na o le ata ee o Talaaifeii ma sisiva fiafia ana fitafita e aunoa lava ma le manatu e i ai se mea o le a tupu aua foi o le la lava e pepese ma mata fiafia mai ma le filemu Samoa. Na o nai itula o le fiafia, ae faafuase’i ona usu a’e le pese o le siva faatoga o le “Matamatame”. O le tu’utu’uga lea ua uma ona fai e uta i ai. Ua osofa’i ma loa au a Samoa sa tatao i le togavao, e selau ma selau tane ua uma ona togi le tagavai e ta’ita’i mai ai toa o Tuna ma Fata. Ua palasi mai ma le mata ita tele i luga o Toga. E toa luaselau le fasi o Toga i totonu lava o le malae ae au sosola isi e tiliola. Ua sosola isi agai i le itu i Saute o Upulu ae tuliloa e Fata ma Ulumasui. Na agai ma le isi solaaga i le itu i Matu, ae tulitatao lava Samoa sa ta’ita’iina e Tuna ma Tupuloa le isi alii toa o Aleipata. E toatele lava Toga na fasia i na tuliloaga. Na o le Tupu ma ni nai isi sa faatasi ma ia na mafai ona taunuu i Nuusugale o lo o tatau ai la latou fuavaa. O iina na tu ai Talaaifeii i luga o le maa ma alaga mai i “Tulatala” o lo o faatali atu ai i le au uso manumalo. Ua uma lona ita, ua leai se isi mea na te mafaia, na o le vivii ma faamalo atu i togafiti poto a Tuna ma Fata. Na i’u ina feiloai atu le au uso ia te ia i Tulatala, ua faamavae ma sauni le alii i lona vaa o le a folau ai i Toga. O le a oso le alii i luga o le vaa, ona fai mai ai lea o ana upu ta’utaua ia: “Malie Toa, Malie Tau Afai e toe oo mai Toga, e sau i le aouliuli folau, a e le toe sau i le aouliuli tau.” Ona folau atu ai lea o Talaaifeii e le’i toe aliali mai lava i Samoa. Ia manuia lau faasausauga Samoa