tatau – Village One Samoana

Maliu mai, Tatala mai a’ao, le mamalu o le Tatou aiga fa’aleTasiSamoana… Aemaise paia o taitai au ma le taitai komiti O le mataupu lava lea, e le o se mataupu faigofie… a’o e fai mo se fesoasoani i tagata olo’o fia laei i le tatau… poo latou foi oloo fia pa’u ia te latou i se malofie faasamoa… ae Fa’amalo atu le Silasila! Faamalo Fa’afetai! I lo’u talitonuga o le Malofie poo le Tatau o Samoa o se Galuega faigata toe manaia ae le gata lea o se aganu’u taua ma se faailoga matagofie mo le tupulaga o Samoa olo’o fia maua se latou tofi i totonu o aiga ma malo faaleatunu’u poo le malo faalematai olo’o iai totonu o nu’u uma lava o Samoa nei… O le mea ua faigata le Malofie aua e tigaina tele… ae le gata lea e toe faigata ona taia se tagata ae le lelei se fa’asamoa… e faapea foi le isi upu fa’asamoa… “E le So’oga Ka Oe!” e faatatau i se tagata ua taina le tatau ae leiloa lelei se fa’asamoa ma ua le masani foi i feau ma matafaioi faalesogaimiti… ia o le ala lea ua ou taumafai atu lenei blog… ia fai ma se fesoasoani mo latou olo’o fia ta latou pe’a atoa ma a’u fo’i ua leva na ou fia ta sa’u pe’a ae ua fa ia te a’u e le lava se fa’asamoa lenei ma ou saili atu le tomai ia faalava ai… afai iai so’u gagana ua sese poo se manatu ua faaletonu aua le faatelegese ae sao ia faatonu mai ina faaleleia le faamoemoe lenei ma faataunu’u i se faaiuga manuia… Fa’amolemole lava faatilotilomasae mai… ua ou fia maua masei uma olo’o iai e faamoemoe i le faaleleia o le aganu’u faamolemole fa’afetai! Ia… ae ui lea… Masalo e tatau ona amata mai i le faamatagi… o le pese lea poo le viiga foi o le Tatau e faamatala ai mea uma e uiga ai ia le tatau…. e amata mai i le tala o fafine toalua mai i fiti na feausi mai ma le ato autapulu fa ia te a’u e fa’apena foi le ipu lama…. ae iu lava ina laulau mai o teuga o le pe’a pei o le selu ma le atualoa…. ia tatou silasila atu i le pese ma tatou faaauau ai lea… O Le Vi’i po’o le Pese o le Tatau… “O le mafuaaga lenei na iloa I le ta’aga le tatau i Samoa O le malaga a Fafine e to’alua na feausi mai fiti i le vasaloloa Na la aumai ai o le ato au Ma si a la pese e tutumau Fai mai e tata o Fafine ae le tata o Tane O le ala na tata ai Tane Ona ua sese si a la pese Taunu’u i gatai o Falealupo Ua vaaia loa o le faisua ua tele Totofu loa lea o Fafine Ma ua sui ai si a la pese Fai mai e tata o Tane ae le Tata o Fafine Silasila i le tama ua ta’atia Ma le tufuga lea ua amatalia Talofa ua tagi aueue ua oteote solo i le Autapulu tele Sole, sole ia e loto tele O le ta’aloga faatamatane e ui lava ina tiga tele Ae mulimuli ane ua e fefete O Atunu’u uma o le Pasefika E sili Samoa le tauta’ua O le Sogaimiti ua Savalivali mai Ua Fepulafi mai ana Fa’a’ila O aso faaifo, faamuli’ali’ao Faaatualoa, selu, faalaufao O le sigano faapea faaulutao Ua ova i le vasa laolao” ia ina ua tatou silasila atu i le pese lea e manino lelei mafuaaga o le taaga tatau o Samoa… ae ui lea ou te faamatala atili…. LINK TO PART II